Description
<p>मराठीतील उत्तमोत्तम साहित्यकृती - कविता<br>
कविता - वामांगी<br>
कवि - अरुण कोल्हटकर<br>
<br>
देवळात गेलो होतो मधे</p>
<p>तिथे विठ्ठल काही दिसेना</p>
<p>रख्माय शेजारी</p>
<p>नुसती वीट</p>
<p>मी म्हणालो असू दे</p>
<p>रख्माय तर रख्माय</p>
<p>कुणाच्या तरी पायावर</p>
<p>डोकं ठेवायचं</p>
<p>पायावर ठेवलेलं</p>
<p>डोकं काढून घेतलं</p>
<p>आपल्यालाच पुढेमागे</p>
<p>लागेल म्हणून</p>
<p>आणि जाता-जाता सहज</p>
<p>रख्मायला म्हणालो</p>
<p>विठू कुठे गेला</p>
<p>दिसत नाही</p>
<p>रख्माय म्हणाली</p>
<p>कुठे गेला म्हणजे</p>
<p>उभा नाही का माझ्या</p>
<p>उजव्या अंगाला</p>
<p>मी परत पाहिलं</p>
<p>खात्री करून घ्यायला</p>
<p>आणि म्हणालो,</p>
<p>तिथे कुणीही नाही</p>
<p>म्हणते, नाकासमोर</p>
<p>बघण्यात जन्म गेला</p>
<p>बाजूचं मला जरा</p>
<p>कमीच दिसतं</p>
<p>दगडासारखी झाली</p>
<p>मान अगदी धरली बघ</p>
<p>इकडची तिकडं</p>
<p>जरा होत नाही</p>
<p>कधी येतो, कधी जातो</p>
<p>कुठं जातो, काय करतो</p>
<p>मला काही काही</p>
<p>माहिती नाही</p>
<p>खांद्याला खांदा भिडवून</p>
<p>नेहमी बाजूला असेल विठू</p>
<p>म्हणून मी पण बावळट</p>
<p>उभी राहिले</p>
<p>आषाढी-कार्तिकीला</p>
<p>इतके लोक येतात नेहमी</p>
<p>मला कधीच कसं कुणी</p>
<p>सांगितलं नाही</p>
<p>आज एकदमच मला</p>
<p>भेटायला धावून आलं</p>
<p>अठ्ठावीस युगाचं</p>
<p>एकटेपण...</p>
---
Send in a voice message: https://podcasters.spotify.com/pod/show/natakwala/message
