<p>Af fingrum fram – Tónlistarmaðurinn Jón Ólafsson ræðir við íslenskt tónlistarfólk um feril þess og lífshlaup.</p><br><p>Jónas Sigurðsson fæddist í friðsælu fiskiþorpi og þótti fyrirferðarmikill og uppátækjasamur. Ofvirkni og athyglisbrestur hjálpuðu ekki til þegar hann gekk hinn vandrataða menntaveg.</p><br><p>Eftir að hafa verið rekinn af heimavist framhaldsskólans samdi hann lag sem snart fleiri en hann grunaði. Hann var rangur maður á röngum tíma í vitlausu húsi en skorti þó ekki hæfileika. Jónas hóf dauðaleit að sjálfum sér í Kaupmannahöfn og las þar flest það sem hann komst yfir og rataði meira að segja inn á gólf Vísindakirkjunnar alræmdu. Í lok þáttarins flytur hann eitt lag ásamt Jóni.</p><br><p>Upphaf þáttanna Af fingrum fram má rekja tæp 20 ár aftur í tímann þegar samnefndir sjónvarpsþættir hófu göngu sína hjá RÚV og hlutu þeir Edduverðlaunin strax á fyrsta vetri. Þættirnir skipta nú tugum, rétt eins og spjalltónleikaröð í Salnum sem ber þessa sömu yfirskrift og hefur gengið fyrir fullu húsi í 11 ár. Jón er meðlimur í hljómsveitinni Nýdönsk og hefur verið ótrúlega afkastamikill á hinum ýmsu sviðum tónlistarinnar í áratugi. Hann skrifaði ævisögu Vilhjálms Vilhjálmssonar.</p><hr><p style='color:grey; font-size:0.75em;'> Hosted on Acast. See <a style='color:grey;' target='_blank' rel='noopener noreferrer' href='https://acast.com/privacy'>acast.com/privacy</a> for more information.</p>