Ons gesels met kunstenaar en skrywer Maritza Breitenbach – ’n vrou wat nie net skep nie, maar ook voel, dink en kyk op maniere wat jou laat stilstaan.<br /> <br /> Van haar internasionaal erkende “The Cookie Book”, wat selfs Oprah se aandag getrek het, tot haar beeldhouwerk wat gevorm word deur die unieke lens waardeur sy die wêreld bekyk – Maritza vat ons in haar kop, haar hart en haar hande.<br /> <br /> Ons praat oor vrouwees. Nie die Instagram-weergawe nie, maar die rou, eerlike weergawe.<br /> <br /> En dan die podsending “Grys en Gatvol”, saam met joernalis Melanie Verwoerd – ’n ruimte waar vroue praat oor peri- en postmenopouse, oor die dinge waaroor daar te min gepraat word, en te veel in stilte “2-uur-in-die-oggend” gegoogle word.<br /> <br /> Maar dis KLETS. Ons bly nie lank op een plek nie.<br /> <br /> Die Peet en Mel Viljoen-sage wat soos ’n sepie bly ontvou, die Oscars wat al hoe meer hul glans verloor, en die vraag of Gwede Mantashe regtig weet hoeveel brandstof Suid-Afrika het… of hoop niemand vra nie, of dalk net hoop die spreadsheets lieg nie.<br /> <br /> En dan, soos ’n goeie laaste noot, kyk ons na Anton Goosen op 80 – want blykbaar is daar op 80 nog meer as net rock en roll in sy pype.<br /> <br /> Dis kuns en kommentaar. Dis vrouwees en wêreldnuus.<br /> Dis dieper gesprekke… Dis KLETS. <a href="https://thecookiebook.co.za/">The Cookie Book</a> &middot; <a href="https://maritzabreitenbach.com/">Maritza Breitenbach</a> &middot; <a href="https://www.afrikaans.radio">Afrikaans.Radio</a> &middot; <a href="https://www.afrikaans.radio/podsendings/klets">KLETS</a> &middot; <a href="https://www.youtube.com/@AfrikaansRadio">KLETS - YouTube</a>