Hierdie week se KLETS begin by die groot verhoog: SONA 2026. Die rooi tapyt, die applous, die beloftes. Maar wat bly oor, ná al die woorde?<br /> <br /> Dan skuif ons van die Parlement se blink ligte na die stofpaaie van die platteland. Ons gesels met Dr Theo de Jager van SAAI, die Suider-Afrika Agri Inisiatief, oor Bek-en-Klouseer in Suid-Afrika. Waar het die pap op die grond geval? En belangriker: hoe gaan dit regtig met die boeregemeenskap? Is daar hoop vir produsente, of gaan die impak ons almal nog lank tref by die kasregister?<br /> <br /> Dis ’n gesprek oor verantwoordelikheid, realiteit en die mense wat elke dag moet opstaan en aanhou, selfs wanneer beleid en beheer hulle faal.<br /> <br /> Indien jy ’n boer is wat ondersteuning of raad benodig, of net wil weet hoe jy betrokke kan raak, kontak SAAI direk:<br /> <br /> WhatsApp: 066 071 6094<br /> Webblad: https://saai.org/<br /> E-pos: [email protected]<br /> <br /> Maar dis nie net krisisse en kommissies nie. Ons skink ook ’n glasie. Wat is die beste waarde-vir-geld wyne tussen R100 en R200? Want as die ekonomie druk, moet jou wyn ten minste nie teleurstel nie.<br /> <br /> En dan, vir nagereg: hoe daai totsiens sê jou van kosbare tyd per jaar beroof. Ons ontleed die kuns van die Suid-Afrikaanse “ek gaan nou” wat nooit nou is nie.<br /> <br /> Dis die parlement en plaashek. Wyn en wagtyd. Dis Suid-Afrika soos hy nou is. <br /> Dis KLETS. <a href="https://www.afrikaans.radio">Afrikaans.Radio</a> &middot; <a href="https://www.afrikaans.radio/podsendings/klets">KLETS</a> &middot; <a href="https://www.youtube.com/@AfrikaansRadio">KLETS - YouTube</a>