Aldi hau kontatzeko

Egunkari feminista bat egiten ahalegintzen gara egunero. Eta konpromiso hori, kazetaritzan ez ezik, etxearen solairu guztietan islatzen saiatzen gara. Bidea sekula ez da erraza izaten esparru honetan, baina bai ederra.

Ezagutzen al dute BERRIA euskal herriko gazteek? Kontsumitzen al dute? Eta helduek, zer nola ikusten gaituzte? Adituek? Guztiak bildu ditugu audio seriearen atal honetan. BERRIA sortu zenean 20 urte zituztenen eta urte horretan jaio zirenen iritziak jasotzeaz gain, Lander Garroren, Amaia Arroyoren, Eneko Bidegainen eta Estitxu Garaien analisiak bildu ditugu. Labur esanda, kanpotik nola ikusten gaituzten jaso dugu atal honetan.

Kulturaren bidez, geure buruari nor izateko baimena ematen diogu BERRIAn, besteak beste. Munduan gertatzen denaren berri ematen dugu, kulturgileen eskutik. Gertakari baten analisia egin, sorkuntza ardatz. Nor izateko plaza bat da BERRIA, euskal kulturgileen eskura jartzen duguna. Eta, hain zuzen horregatik, gaur, guk sortu ordez, kulturgileak ekarri ditugu hona, haiek sor dezaten. Guztiei galdera berdina egin diegu: BERRIAk zer ekarpen egiten dio euskal kulturgintzari? Eta kulturgileei? Aner Peritz bertsolaria, Mejillon Tigre kolektiboko sortzaileak, eta Idoia Torregarai eta Mirari Martiarena umoregileak izan ditugu gurean. Bakoitzak bere doinu, neurri eta diziplinan erantzun digu.

Egunkari nazionala da BERRIA. Euskarazko egunkari nazional bakarra. Naziotasuna da BERRIAren identitateetako bat, balio bereizgarrietako bat. Baina zergatik? Eta zer dela-eta du horrenbesteko garrantzia nazio ikuspegiak? Galdera horiei erantzuteko, Amagoia Mujika BERRIAko zuzendaria gonbidatu dugu. Ekhi Erremundegi Baionako delegazioko kazetaria, Ion Orzaiz Iruñeko delegazioko kazetaria eta Jule Goikoetxea EHUko zientzia politikoetako irakaslea ere izan dira gurean.

Munduan zer gertatzen den eta zergatik. Hori euskaraz jaso eta ematea izan da BERRIAren helburuetako bat. Lekuko izan eta lekuko egin. Aldi hau ere mundutik kontatzen dugulako. Gurekin izan zara, irakurle, Kolonbiako bake prozesuan, Fidel Castroren heriotzaren omenaldietan, Ekialdi Hurbileko gatazketan, Olinpiar Jokoetan, Ukrainako gerraren muinean. Asko dira maletan grabagailua, kamera eta arkatza sartu, eta munduaren punta batera joan diren BERRIAko kazetariak. Nola gogoratzen duten jakin nahi?