Omam Podcast - أُمم مع ميرنا الزيني

في العادة، بنستنى نهاية سعيدة لأي قصة إيمانية، انتصار المؤمنين وهلاك الظالمين. لكن، هل ممكن النصر يكون في الهلاك نفسه؟ وهل القصة فعلًا بتنتهي عند اللحظة دي، ولا ليها تكملة؟ في حلقة النهاردة هنسافر عبر الزمن لليمن، تحديدًا نجران في القرن السادس، قبل بعثة الرسول ﷺ. هنقابل ملك ظالم، وساحر عجوز، وولد صغير اتعلق بين طريقين مختلفين تمامًا. ولد المفروض يتعلم السحر ويبقى أداة الملك للسيطرة على الناس... لكنه بيختار طريق تاني خالص. طريق هيقلب المملكة رأسًا على عقب! إزاي الغلام الصغير بقى رمز للإيمان؟ وإزاي المواجهة بينه وبين الملك وصلت لأكبر اختبار في التاريخ؟

في حلقة سيدنا إبراهيم ج٢ بيكمل رحلته في الدعوة، وبيتنقل بين بلاد الشام ومصر. طب إزاي اتجوز السيدة هاجر؟ وليه سابها هي وابنها الطفل الرضيع في الصحرا؟ وعمل إيه لما ربنا حطه قدام أعظم اختبار في تاريخ البشرية؟

ليه سيدنا إبراهيم تحديدًا هو خليل الله؟ ليه هو الوحيد اللي بنصلي عليه في كل تشهد؟ في الجزء الأول من قصته، بنرجع أكتر من ٤٠٠٠ سنة لورا، لأرض بابل في عهد النمرود، وبنشوف إزاي إبراهيم عليه السلام وقف لوحده في وش قومه، وحطم الأصنام، وواجه الملك الظالم بأقوى حُجة! إزاي نجا من النار؟ وإزاي خلّى النمرود يتصدم ومايعرفش يرد؟ كل ده هتعرفوه في الحلقة دي!

: في الحلقة دي من بودكاست أمم هنتكلم عن رحلة قوم موسى ونجاتهم من فرعون، ونكشف فيها تفاصيل سنين التيه في الصحراء، وليه رفضوا دخول الأرض المقدسة، وإزاي انتهى بهم المطاف في مواجهة جالوت.

مين هو ذو القرنين؟ هل هو شخصية حقيقية؟ هل كان ملك قوي ولا مجرد قائد عادي؟ وليه قصته في القرآن بدأت ولسه مخلصتش؟ في الحلقة دي، هناخدك في رحلة مع الملك الرحالة ذو القرنين، اللي ربنا مكنه في الأرض وأعطاه من كل شيء سببًا. هنمشي معاه في رحلته لثلاث أمم مختلفة، واحدة في مغرب الشمس، واحدة في مطلعها، والثالثة كانت بتعاني من خطر يأجوج ومأجوج. هنتكلم عن تفسير العلماء القدامى والحديثين للمناطق اللي زارها، وإزاي قصة ذو القرنين ارتبطت بشخصيات تاريخية زي الإسكندر الأكبر، وليه مصطفى محمود كان شايف إن مطلع الشمس ممكن يكون في المناطق القطبية.