<p>ཧྥ་རན་སི་ནང་གནས་སྡོད་གནང་མཁན་བོད་དོན་ལས་འགུལ་བ་བོད་མི་བསོད་ནམས་དོན་གྲུབ་ལགས་ཀྱིས་ཕྱི་ཟླ་ ༤ ཚེས་ ༡ སྟེ་ཁ་སང་ནས་འགོ་འཛུགས་ཀྱིས་ཟླ་བ་བཞི་ཙམ་རིང་བོད་དོན་དྲིལ་བསྒྲགས་ཆེད་རྐང་འཁོར་སྐོར་སྐྱོད་གནང་བཞིན་པ་རེད་འདུག དེ་ཡང་བསོད་ནམས་དོན་གྲུབ་ལགས་ཀྱིས་རང་གི་སྤྱི་ཚོགས་དྲྭ་གནས་ཐོག སྤྱིར་རང་ངོས་ནས་ལོ་ཤས་སྔོན་ལས་འགུལ་དེ་ལྟར་སྤེལ་འཆར་ཡོད་ཀྱང་དངོས་སུ་ལམ་ལྷོང་བྱུང་མེད་པ་གསལ་སྟོན་གནང་ཏེ། སྔ་ལོ་ནས་སླར་ཡང་འཆར་གཞི་དེ་ལྟར་བཏིང་པ་དང་གྲ་སྒྲིག་ཆ་ཚང་ལེགས་གྲུབ་ཟིན་པ་འགྲེལ་བརྗོད་གནང་བ་དང་འབྲེལ། ཁ་སང་ཧྥ་རན་སིའི་བྱང་ཕྱོགས་མངའ་སྡེ་ Grenoble ནས་འགོ་འཛུགས་ཀྱིས་ཁུལ་དེའི་གྲོང་ཁྱེར་ཆེ་ཁག་ ༢༧ ཙམ་བརྒྱུད་མཐར་ས་གནས་དེ་རང་བར་ཁྱོན་ཟླ་བ་བཞི་ཙམ་རིང་སྐོར་སྐྱོད་གནང་འཆར་ཡོད་པ་གསུངས་འདུག ཐེངས་འདིའི་ལས་འགུལ་དེའི་ཐོག་གི་དྲིལ་བསྒྲགས་ནང་དོན་གཙོ་བོ་ནི་རྒྱ་ནག་དམར་ཤོག་ཚོགས་པའི་གདུག་རྩུབ་ཀྱི་བྱ་སྤྱོད་ཡོངས་གྲགས་ཡིན་པ་དང་། ཁོ་ཚོས་གསར་བརྗེའི་མིང་ཐོག་ནས་མི་གསོད་ཁྲག་སྦྱོར་གྱི་བྱ་སྤྱོད་སྤེལ་ཏེ་ ༡༩༥༩ ལོར་བོད་མགོ་སྐོར་དང་གདུག་རྩུབ་ཀྱི་བཙན་གནོན་ལ་བརྟེན་ནས་བཟུང་ཡིན་པ། &#160;ཁྲིམས་འགལ་གྱི་བཙན་ཁྲིད་བྱས་པའི་ཆུང་སྲིད་༸པཎ་ཆེན་རིན་པོ་ཆེ་མཆོག་གི་འདས་སོན་གྱི་གནས་ཚུལ་ཁ་གསལ་གྱིས་གཞན་བླ་སྤུལ་རྣམས་དང་། ཉེས་མེད་བཙོན་པ་རྣམས་གློད་གྲོལ་གཏོང་དགོས་པ་སོགས་ཀྱི་བོད་ནང་ཀྱི་ད་ལྟའི་དངོས་ཡོད་ཛ་དྲག་གནས་སྟངས་དོན་ཚན་བཅུ་དང་། ཧྥ་རན་སི་ནང་བོད་དང་འབྲེལ་བའི་གནས་ཚུལ་བཅས་དོན་ཚན་ ༡༣ ཐོག་དྲིལ་བསྒྲགས་གནང་གི་ཡོད་པ་རེད། འདི་ག་རླུང་འཕྲིན་ཁང་གིས་གནད་དོན་དེ་འབྲེལ་བོད་མི་བསོད་ནམས་དོན་གྲུབ་ལགས་སུ་བཀའ་འདྲི་ཞུ་སྐབས་ཁོང་གིས། ཁ་སང་ནས་འགོ་འཛུགས་ཀྱིས་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ལས་འགུལ་དེ་བཞིན་སྤེལ་བ་འགྲེལ་བརྗོད་གནང་ཐོག ཉིན་དང་པོར་སྤྱེ་ལེ་ ༦༧ གནང་རྒྱུ་བྱུང་བ་དང་དེ་རིང་ས་གནས་ Valence ནང་སྤྱི་ལེ་ ༥༥ ཙམ་ཕེབས་ཡིན་པ་འགྲེལ་བརྗོད་གནང་བ་དང་འབྲེལ། ལས་འགུལ་དེའི་བརྒྱུད་ད་ལྟ་སེམས་ཤུགས་ཡོད་པའི་སྐབས་སུ་བོད་ནས་ཕེབས་མཁན་རྣམ་པས་བཙན་བྱོལ་དུ་སྐྱེས་པའི་བོད་ཕྲུག་རྣམས་ལ་སེམས་ཤུགས་སྦྱིན་ནས་ལས་འགུལ་དེ་ལྟར་མཉམ་དུ་སྤེལ་རྒྱུའི་དུས་ལ་བབས་ཡོད་པ་སོགས་འགྲེལ་བརྗོད་གནང་སོང་། རྩ་བའི་བསོད་ནམས་དོན་གྲུབ་ལགས་ཀྱིས་བོད་དོན་དྲིལ་བསྒྲགས་ལས་འགུལ་དེ་བཞིན་སྤེལ་བ་ཐེངས་དང་པོ་མིན་པར་ཧྥ་རན་སི་ནང་ལོ་ལྟར་སྲུང་བརྩི་ཞུ་བཞིན་པའི་འཛམ་གླིང་རྒྱལ་དར་ཉིན་མོར་ལོ་བཞི་ཙམ་མཉམ་ཞུགས་གནང་མྱོང་མཁན་ཞིག་ཡིན་པ་དང་། གཞན་ཡང་བོད་དོན་དྲིལ་བསྒྲགས་ཆེད་ཞི་བའི་གོམ་བགྲོད་སོགས་ཀྱི་ལས་འགུལ་ལའང་མཉམ་ཞུགས་གནང་མཁན་ཞིག་ཡིན་པ་རེད།</p> <p>The post <a href="https://vot.org/%e0%bd%a7%e0%be%a5%e0%bc%8b%e0%bd%a2%e0%bd%93%e0%bc%8b%e0%bd%a6%e0%bd%b2%e0%bc%8b%e0%bd%93%e0%bd%84%e0%bc%8b%e0%bd%96%e0%bd%bc%e0%bd%91%e0%bc%8b%e0%bd%98%e0%bd%b2%e0%bc%8b%e0%bd%96%e0%bd%a6%e0%bd%bc/">ཧྥ་རན་སི་ནང་བོད་མི་བསོད་ནམས་དོན་གྲུབ་ལགས་ཀྱིས་བོད་དོན་དྲིལ་བསྒྲགས་ཆེད་རྐང་འཁོར་སྐོར་སྐྱོད་འགོ་འཛུགས་གནང་འདུག</a> appeared first on <a href="https://vot.org">vot</a>.</p>