སྦེལ་ཀོབ་བཅའ་བཞུགས་ཁེ་ན་དྲའི་མི་སེར་ཡིན་པའི་བོད་མི་ཞིག་གི་འོས་བསྡུའི་ཐོབ་ཐང་དང་འབྲེལ་བའི་ཁ་མཆུ་ཨང་ ༢༣ ཕམ་སོང་།

དེ་རིང་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གིས་ཕྱི་རྒྱལ་ནས་རྒྱ་གར་དུ་ཕྱིར་ལོག་གནང་མཁན་བོད་མི་ཞིག་གི་འོས་བསྡུ་ཐོབ་ཐང་དང་འབྲེལ་བའི་ཁ་མཆུ་ཨང་ ༢༣ པའི་མཐའ་མའི་ཐག་གཅོད་ཀྱི་བཅད་ཁྲ་ཁྱབ་བསྒྲགས་གནང་བའི་ནང་། གྱོད་ཡ་ཕྱོགས་གཉིས་ཀྱི་ཞུ་སྙན་དང་དཔང་རྟགས། ཁྲིམས་སྒྲིག་གི་འཇུག་ཚུལ་དང་། དེ་དག་གི་རྒྱུ་མཚན་ལ་བརྟེན་ནས་གྱོད་ཡ་ཞུ་སྦྱོར་བ་བསྟན་འཛིན་མཁས་གྲུབ་ལགས་ད་ལྟའི་བཙན་བྱོལ་བོད་མིའི་ཁྲིམས་སྒྲིག་དགོངས་དོན་རྒྱ་བལ་འབྲུག་གསུམ་ནས་ཆོལ་ཁ་ཆོས་བརྒྱུད་ཀྱི་སྤྱི་འཐུས་ཀྱི་འོས་གཞིར་ཞུགས་པ་དང་འོས་ཤོག་འཕེན་ཆོག་གི་མི་འདུག རྩ་བའི་འདི་ལོའི་ཕྱི་ཟླ་ ༥ ཚེས་ ༢༨ ཉིན་ལུགས་བསམ་མཉམ་འབྲེལ་གྱི་འགན་འཛིན་ཚོགས་པའི་ཚོགས་གཞོན་བསྟན་འཛིན་མཁས་གྲུབ་ལགས་ཁེ་ན་ཌའི་མི་སེར་ཡིན་ཡང་འདས་པའི་ལོ་ ༣ ཙམ་ནས་ཁོང་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་ནང་དུ་བཅའ་སྡོད་གནང་བཞིན་ཡོད་པ་དང་། དཔྱ་ཁྲལ་འབུལ་བབ་ཀྱང་རྒྱ་གར་ནས་འབུལ་བཞིན་ཡོད་པ་ལྟར། འདི་ལོའི་བཅན་བྱོལ་བོད་མིའི་འོས་བསྡུའི་ཁྲོད་ཁོང་ལ་རྒྱ་གར་ནང་བཅའ་སྡོད་བོད་མི་གཞན་དང་མཚུངས་པའི་འོས་བསྡུའི་ཐབ་ཐང་སྤྲད་མེད་པའི་གནད་དོན་དང་འབྲེལ་ནས་དབུས་འོས་བསྡུ་ལས་ཁང་ལ་ཁྲིམས་གཏུགས་བྱས་ཡོད་པ་དང་ཆབས་ཅིག །དེ་འབྲེལ་ཆེས་མཐོའི་ཁྲིམས་ཞིབ་ཁང་ནས་གྱོད་གཞི་དེ་བཞིན་ངོས་ལེན་ཐོག །ཉེ་ལམ་ཕྱི་ཟླ་ ༨ ཚེས་ ༥ དང་ ༡༢ དེ་བཞིན་ ༡༩ བཅས་ལ་ཉན་ཞིབ་དང་ཞིབ་དཔྱོད་ཀྱི་ལས་རིམ་འཚོགས་ཡོད་པའི་ཐོག །ཆེས་མཐོའི་ཁྲིམས་ཞིབ་ཁང་ནས་གྱོད་ཡ་ཞུ་སྦྱོར་བའི་ཁྲིམས་རྩོད་པས་དབུས་འོས་བསྡུ་ལས་ཁང་གི་ཞུ་སྦྱོར་བ་དང་འབྲེལ་བའི་ཐག་གཅོད་དེ་དག་བཅའ་ཁྲིམས་དང་འོས་བསྡུའི་སྒྲིག་གཞི་དང་འགལ་ཡོད་པ་དང་། ལྷག་པར་དོ་བདག་ཞུ་སྦྱོར་བ་རང་ཉིད་ཁེ་ན་ཌའི་མི་སེར་དང་དཔྱ་ཁྲལ་ལག་དེབ་ཀྱི་ཐོབ་ཁུངས་ཡང་ཁེ་ན་ཌ་ཡིན་བཞིན་དུ། གནས་སྡོད་ཅེས་པའི་ཚིག་གཞི་དེ་དང་འབྲེལ་ནས། ཁེ་ན་ཌའི་གནས་སྡོད་མིན་པ་དང་། རྒྱ་བལ་འབྲུག་གསུམ་གྱི་ཆོལ་ཁའི་སྤྱི་འཐུས་ཀྱི་འོས་གཞིར་ཞུགས་རྒྱུའི་ཐོབ་ཐང་ཡོད་པའི་ཁྲིམས་དོན་གྱི་གནད་དོན་དོན་ཚན་གཉིས་ཀྱི་ཐོག་ཁུངས་སྐྱེལ་གནང་དགོས་པ་གསུངས་ཡོད་པ་རེད། དེ་རིང་ཁ་མཆུ་ཨང་ ༢༣ ཐོག་མཐའ་མའི་བཅད་ཁྲ་ཁྱབ་བསྒྲགས་ཀྱི་ལས་རིམ་དེའི་ཐོག །ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་དབུས་པའི་ཁྲིམས་ཞིབ་པ་རྣམ་པ་དང་། ཆེས་མཐོའི་ཁྲིམས་ཞིབ་ཁང་གི་ལས་བྱེད་རྣམ་པ། གྱོད་ཡ་ཞུ་སྦྱོར་བ་བསྟན་འཛིན་མཁས་གྲུབ་ལགས་ཀྱི་ཁྲིམས་རྩོད་པ་བོད་མིའི་ཁྲིམས་ལུགས་རིག་པ་བའི་ཁྲིམས་རྩོད་པ་རིན་ཆེན་དབང་རྒྱལ་ལགས་དང་བསྟན་འཛིན་ཡར་རྒྱས་ལགས། དེ་བཞིན་གྱོད་ཡ་རྩོད་ལེན་པ་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་བློ་བཟང་ཡེ་ཤེས་མཆོག་དང་། གཞན་ཡང་ཟུར་ཉན་པ་དང་གསར་འགོད་པ་བཅས་ལྷན་འཛོམས་ཐོག །ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གིས་བཅད་ཁྲ་དེ་ཉིད་སྒྲོག་སྦྱང་གནང་བའི་ནང་། ཆེས་མཐོའི་ཁྲིམས་ཞིབ་པ་རྣམ་པས་བཙན་བྱོལ་བོད་མིའི་བཅའ་ཁྲིམས་ཀྱི་སྤྱི་དམངས་གཏུག་བཤེར་ཁྲིམས་སྒྲིག་གི་དགོངས་དོན་ལྟར་གྱོད་ཡ་ཞུ་སྦྱོར་བ་དང་གྱོད་ཡ་རྩོད་ལེན་པ་གཉིས་ཀྱི་ཞུ་རྩའི་ནང་གང་དང་གང་འཁོད་མེད་དང་། ལྷག་པར་ཁ་མཆུ་དེ་ཉིད་དང་འབྲེལ་ཉན་ཞིབ་སྐབས་ཞུ་རྩ་དང་། ཞུ་ལན་བཅས་ལ་འདྲི་ཞིབ་གནང་རྗེས། གྱོད་ཡ་ཞུ་སྦྱོར་བའི་ཁྲིམས་རྩོད་པས་གོང་གསལ་ཁྲིམས་དོན་གྱི་གནད་དོན་དོན་ཚན་གཉིས་ཀྱི་ཐོག་ཁུངས་སྐྱེལ་གནང་དགོས་ཀྱི་ཡོད་པ་དེ་བཞིན་གནང་ཐུབ་མེད་པར་བརྟེན། གྱོད་ཡ་ཞུ་སྦྱོར་བ་བསྟན་འཛིན་མཁས་གྲུབ་ད་ལྟའི་བཙན་བྱོལ་བོད་མིའི་ཁྲིམས་སྒྲིག་དགོངས་དོན་རྒྱ་བལ་འབྲུག་གསུམ་ནས་ཆོལ་ཁ་ཆོས་བརྒྱུད་ཀྱི་སྤྱི་འཐུས་ཀྱི་འོས་གཞིར་ཞུགས་པ་དང་འོས་ཤོག་འཕེན་ཆོག་གི་མི་འདུག་པའི་བཅད་ཁྲ་བཏང་ཡོད་པ་གསུངས་སོང་། འདི་གའི་གསར་འགོད་པས་ཁ་མཆུ་ཨང་ ༢༣ ཐོག་མཐའ་མའི་བཅད་ཁྲ་ཁྱབ་བསྒྲགས་ཀྱི་ལས་རིམ་གྲུབ་མཚམས་སུ་གྱོད་ཡ་ཞུ་སྦྱོར་བ་བསྟན་འཛིན་མཁས་གྲུབ་ལགས་ཀྱི་ཁྲིམས་རྩོད་པ་རིན་ཆེན་དབང་རྒྱལ་ལགས་དང་རྩོད་ལེན་པ་དབུས་འོས་བསྡུ་འགན་འཛིན་བློ་བཟང་ཡེ་ཤེས་མཆོག་རྣམ་གཉིས་ལ་བཅར་འདྲི་ཁག་གཅིག་ཞུས་ཡོད། གཞི་རྩའི་སྐབས་དེར་ཆེས་མཐོའི་ཁྲིམས་ཞིབ་ཁང་ནས་ད་ལྟའི་བཙན་བྱོལ་བོད་མིའི་སྤྱི་ཚོགས་ཀྱི་འགྱུར་འགྲོས་ལ་བརྟེན་ནས། རྩོད་ལེན་པ་དབུས་འོས་བསྡུ་ལས་ཁང་ནས་ཁ་མཆུ་འདིའི་ཉན་ཞིབ་སྐབས་གསུང་བ་བཞིན། འབྲེལ་ཆགས་སྒྲིག་གཞི་ཁག་ལ་བསྐྱར་བཅོས་དགོས་ངེས་ཁག་ངེས་པར་དུ་བོད་མི་མང་སྤྱི་འཐུས་ལྷན་ཚོགས་སུ་འཆར་འབུལ་ཞུ་དགོས་གལ་ཡིན་པ་མ་ཟད། དོ་བདག་ཞུ་སྦྱོར་བས་དཔྱ་དངུལ་འབུལ་འབབ་རྒྱ་བལ་འབྲུག་གསུམ་གྱི་འབུལ་འབབ་ཆུང་ཐབས་ཀྱིས་ཕུལ་འདུག་པར། ཁྲིམས་སྒྲིག་ནང་གསལ་ལག་བསྟར་བྱུང་མི་འདུག་ན། བཙན་བྱོལ་བོད་མིའི་ཁྲིམས་སྒྲིག་དགོངས་དོན་ལག་བསྟར་བྱ་དགོས་པའི་ལམ་སྟོན་ཕེབས་སོང་། The post སྦེལ་ཀོབ་བཅའ་བཞུགས་ཁེ་ན་དྲའི་མི་སེར་ཡིན་པའི་བོད་མི་ཞིག་གི་འོས་བསྡུའི་ཐོབ་ཐང་དང་འབྲེལ་བའི་ཁ་མཆུ་ཨང་ ༢༣ ཕམ་སོང་། appeared first on vot.