<p>Wëllkomm zréck an der Poterkëscht!</p><p>Haut hu mir eng Apprenante aus dem INLL bei eis am Studio, déi eis e bëssen iwwer hire Beruff als Ernärungsberoderin erzielt.</p><p>Duerno héiere mir e Rezept fir eng Geméiszopp.</p><p>Vill Spaass beim Nolauschteren!</p><p>-</p><p>Transkript Rezept Geméiszopp</p><p>A: Merci, dass du mir mat der Zopp hëllefs, da geet et méi séier. Mir musse vill Geméis schneiden.  </p><p>B: Gär geschitt! Wat fir eng Zopp kache mir? </p><p>A: Mir kachen eng Geméiszopp. D’Rezept ass net schwéier an d’Zopp schmaacht immens gutt! </p><p>B: Wat fir Ingredienten, also Zutate brauche mir? </p><p>A: Mir brauchen Ënnen, Knuewelek, Gromperen, Muerten, Zelleri, Porretten a Geméisbritt. </p><p>B: Ok. Wou sinn d’Saachen? </p><p>A: D’Ënnen, de Knuewelek an d’Grompere sinn hei an ... hei. De Rescht ass am Frigo.  </p><p>B: Kanns du mir fir d’éischt den Oflaf erklären?  </p><p>A: Natierlech! Fir d’éischt wäsche mir d’Geméis. </p><p>B: Alles?  </p><p>A: Jo. Alles ausser d’Ënnen an de Knuewelek. Duerno schiele mir d’Gromperen, d’Muerten, d’Ënnen an de Knuewelek. An da schneide mir d’Ënnen, de Knuewelek, den Zelleri an d’Porretten a Stécker. Wat wëlls du gär maachen? </p><p>B: Ech kann de Knuewelek, d’Ënnen, d’Gromperen an d’Muerte schielen an alles a Stécker schneiden. </p><p>A: Ok. Da schneiden ech den Zelleri an d’Porretten. Ech brauch dann nach e Schneidbriet, e Messer an e Geméisschieler(???). </p><p>B: Wat maache mir duerno? </p><p>A: Duerno brauche mir en Dëppen. </p><p>B: En Dëppe mat Waasser? </p><p>A: Net direkt. Fir d’éischt brode mir d’Ënnen an de Knuewelek mat Ueleg un. </p><p>B: Firwat? </p><p>A: Se kréie méi Goût an d’Zopp kritt méi Aroma. </p><p>B: Ech verstinn. </p><p>A: Duerno kommen d’Stécker Porrett an den Zelleri an d’Dëppen a mir réieren alles ëm. <br>Da kommen nach d’Gromperen an d’Muerten dran, a mir fëllen d’Dëppe mat Waasser. </p><p>B: Wéini kënnt de Geméisküb dran? </p><p>A: Wann d’Waasser kacht. Ech hu kee Küb, ech hu Geméisbritt a Form vu Pudder an engem Glas. </p><p>B: Ok. Wéi vill? </p><p>A: Zwee Iessläffelen. Mir kënnen duerno nach salzen a wierzen. </p><p>B: An dann? </p><p>A: Da maache mir den Deckel op d’Dëppen a loossen d’Geméis fofzéng bis zwanzeg Minutte kachen. Wärenddeem kënne mir spullen, d’Kiche botzen an den Dësch decken. Heiansdo kontrolléiere mir d’Dëppen, well d’Waasser iwwerlafe kann. Häss du gär Brout derbäi? </p><p>B: Jo, ganz gär! </p><p>A: Ok. Ech schneiden e puer Tranchen. Wann d’Geméis fäerdeg ass, mixe mir et. Duerno schmaache mir, ob d’Zopp nach Salz oder Peffer brauch. An dann ass se scho fäerdeg! </p><p>B: Mmm, ech freeë mech schonn drop! </p><p>A: Wat wëlls du gär drénken? Ech hu platt Waasser, Spruddelwaasser, Orangëjus, Limonad, Béier a Wäin. </p><p>B: Platt Waasser, wannechgelift. </p><p>A: Ass Krunnewaasser ok? Eist Krunnewaasser schmaacht immens gutt. </p><p>B: Gären! </p><p>A: Tipptopp! Ech huelen eng Limonad. Ech stelle se schonn an de Frigo. </p><p>B: Fänke mir un? </p><p>A: Jo! </p>